سلسلة تبسيط المصطلحات السياسية للشباب “18 – 25 سنة”
الحلقة الخامسة عشرة: التمكين السياسي.. كيف نصنع جيلا قادرا على المشاركة؟
قبل ما نبدأ حلقة النهارده
خلوني أوجه كلامي لأصدقائي السياسيين اللي بنعمله مع بعض هنا مش مجرد متابعة لمصطلحات، لكن رحلة وعي حقيقية، بتكبر مع كل حلقة، وكل سؤال منكم، كل فكرة بتطرحوا فيها رأيكم، بتخليني أؤكد إن الجيل ده مش جيل متفرج، لكن جيل بيفكر وبيحلل وبيسأل، وده في حد ذاته قيمة كبيرة جدا
يلا نبدأ حلقة النهارده
تخيل معايا إن عندك مجتمع صغير، مدرسة أو جامعة أو فريق عمل، وفيه أشخاص عندهم طاقة وأفكار وقدرات، لكنهم محتاجين فرصة ومعرفة وتدريب علشان يشاركوا بشكل فعّال
هنا بييجي مفهوم “التمكين السياسي”
التمكين السياسي هو كل الجهود اللي بتساعد الأفراد وخاصة الشباب والمرأة على فهم السياسة والمشاركة فيها بشكل واعي ومنظم.
بمعنى أبسط، مش بس ندي الناس فرصة يشاركوا، لكن كمان نجهزهم بالمعلومات والمهارات اللي تخلي مشاركتهم فعالة، زي إيه مثلا، التوعية السياسية، برامج تدريب للقيادات الشبابية، إتاحة فرص المشاركة داخل الأحزاب والمؤسسات، تشجيع النقاش والحوار، فتح المجال لآراء جديدة وأفكار مختلف.
لكي تتضح الصورة أكثر، تخيل طالب عنده موهبة قوية جدا، لكن مفيش تدريب أو دعم، غالبا موهبته هتفضل محدودة، لكن لو تم دعمه وتدريبه وإتاحة الفرصة له، هيقدر يحقق نجاح كبير جدا، والسياسة نفس الفكرة تماما، مش مجرد وجود فرصة، لكن وجود استعداد ومعرفة وثقة بالنفس
والآن خليني أسألكم يا أصدقائي، في رأيكم، إيه أهم حاجة تساعد الشباب يشاركوا في الحياة السياسية بشكل أكبر؟
التعليم؟
الفرص داخل الأحزاب؟
وجود قدوة سياسية قريبة منهم؟
ولا كل ما سبق؟
اكتبوا رأيكم بصراحة، لأن كل فكرة منكم بتقربنا خطوة لفهم أفضل لمستقبل المشاركة السياسية
وفي الحلقة القادمة هنبدأ ندخل في مفهوم مهم جدا وهو “اللامركزية الحزبية” وهنفهم إزاي القرارات ممكن تكون أقرب للناس مش مركزة في مكان واحد
