محمد علاء منيعم يكتب : إزاى الفكرة تتحول واقع؟!
سلسلة تبسيط المصطلحات السياسية للشباب “18 – 25″ سنة”
الحلقة العاشرة: التعبئة السياسية.. إزاي الفكرة تتحول لحركة على الأرض؟
قبل ما نبدأ حلقة النهارده، خلوني أقولكم حاجة صادقة جدا من غير أي مجاملة، الحوار اللي بيني وبينكم من أول السلسلة لحد دلوقتي خلاني أرجع أراجع وأفكر وأبحث أكتر
مش بس علشان أشرح، لكن علشان أكون أدق في الشرح، وأقرب في الفهم، وأبسط الفكرة من غير ما نفقد معناها الحقيقي، وده في حد ذاته بالنسبة لي هو أكبر مكسب في السلسلة دي.
الفكرة مش اتجاه واحد، لكن حوار حي بيني وبينكم، يخلينا كلنا نفهم أكتر، ونرتقي في التفكير خطوة خطوة
يلا نبدأ حلقتنا، تخيل معايا إن عندك فكرة قوية جدا، فكرة ممكن تحل مشكلة في مدرستك أو منطقتك، لكن الفكرة لسه موجودة في الورق أو في الكلام بين الأصدقاء
السؤال هنا، إزاي الفكرة دي تتحول لحركة حقيقية على الأرض؟، هنا بييجي مفهوم “التعبئة السياسية”.
التعبئة السياسية هي كل الجهود اللي بيقوم بيها الحزب أو أي جهة سياسية عشان توصل أفكارها للناس وتخليهم يفهموها ويتفاعلوا معاها ويدعموها ويشاركوا فيها
محمد علاء منيعم يكتب: يعني ايه عضوية حزبية؟!
بمعنى أبسط، مش بس إنك تقول فكرة، لكن إنك تخلي الناس تفهمها، وتقتنع بيها، وتتحرك معاها، زي إيه مثلا
حملات توعية، لقاءات مع الناس، ندوات ومناقشات، نشاطات ميدانية في الشارع أو الجامعة أو القرى، استخدام الإعلام ووسائل التواصل
كل ده يدخل تحت مفهوم التعبئة السياسية، لكن المهم نفهم حاجة أساسية، التعبئة مش معناها ضغط أو فرض رأي، لكن معناها تواصل وإقناع وتفاعل، ولكي تتضح الصورة أكثر، تخيل فريق عنده مشروع مهم جدا، لكن بدل ما يشتغل في صمت، بيبدأ يتكلم مع الناس
يشرح لهم المشروع، ويخليهم جزء منه، كل ما الناس تفهم أكتر، كل ما الدعم يزيد، والفكرة تكبر، والآن خليني أسألكم سؤال مهم جدا
إيه الطريقة اللي بتخلي أي فكرة تنتشر بين الشباب بشكل أسرع في رأيكم؟
الكلام المباشر؟
السوشيال ميديا؟
التجربة العملية والمشاركة؟
ولا كل ده مع بعض؟
اكتبوا رأيكم لأن كل إجابة منكم بتفتح باب لفهم جديد
وأنا بصراحة بقولها لكم بصدق، كل تعليق وكل فكرة منكم بتخليني أرجع أفكر وأبحث وأطور في طريقة الشرح، لأن الهدف مش إني أشرح وخلاص، لكن إننا نفهم سوا
وفي الحلقة القادمة هنبدأ ندخل في مفهوم مهم جدا وهو “التعددية الحزبية” وهنفهم ليه وجود أكتر من حزب مش مشكلة بل قوة في أي نظام سياسي
